Buot tevnnegat mat bohtet midjiide ovdal áigemeari, leat mielde gilvvus, mas buoremusat ožžot bálkkašumi. Tevnnegat galget leat mielde čájáhusas mas lea seamma namma “Mánát boazodoalus 2009” Boazoálbmogiid 4.Máilbmekongreassa vuolde. Mielddusin lea dárkileappot dieđuid gilvvu birra oktan oasálastinnjuolggadusaiguin, gáibádusaid ja áigemeari birra, gosa sáddet tevnnegiid ja eambbo dieđut bálkkašumi birra.

Ovddasvástideaddji lágideaddji
Máilmmi Boazoálbmogiid Searvvi (WRH) čállingottis Guovdageainnus Norggas lea ovddasvástádus gilvvus. Gilvu lágiduvvo Boazoálbmogiid 4.Máilbmekongreassa oktavuođas, mii lágiduvvo Guovdageainnus Norggas njukčamánu 30.b. – cuoŋománu 3.b. 2009.

Gii sáhttá oasálastit?
Boazodoallománát gitta 16 jagi rádjái ieš guđet regiovnnaid miehtá sirkumpolára guovllu sáhttet oasálastit gilvvus iežas tevnnegiiguin.

Fáddá
Gilvvu fátta lea “Mánát boazodoalus”. Mii dáhttut tevnnegiid mat govvejit boazodoalu ieš guđet guovllus, nu go mánát oidnet ealáhusa. Ovttaskas oasálasti sáhttá ieš mearridit maid tevdne nu guhkká go lea juoga mii lea čadnon boazodollui.

Mii gáibiduvvo?
Tevnnegat sáhttet leat liánttasárgumiid rájes gitta akvareallaide, muorras dahje linoleum- deaddiluvvon govat, oljomálemat jna. Tevnnega sturrodat galgá leat unnimusat A4-sturrodat ja eanemusat 4 x A4 sturrodat. Tevnnegiid ii galgga rámmet. Tevdnejeaddji namma, ahki, orrunbáiki, regiovdna ja riika galgá čállot tevnnega vuollerávdii, juoga gurut dahje olgeš beallái. (Ovdamearkka dihte: Ivan V. Galkin, 4 jagi, Lujávri, Murmansk Oblast, Ruošša) Sáhttá maid čállit skuvlla, mánáidgárddi dahje boazodoalloovttadaga nama, jos háliida. Sáhttá maid bidjat nama govvii, muhto dat ii leat gáibádus iige atte makkárge ovdamuni gilvvus.

Árvvoštallan ja bálkkašupmi
Nammaduvvo joavku mii vállje buoremus govaid mat ožžot bálkkašumi. Buot oasálastit geaid tevnnegat dohkkehuvvojit leat mielde gilvvus ožžot diploma mas duođaštuvvo ahte lea leamaš mielde gilvvus “Mánát boazodoalus – 2009”.

Oamasteapmi, čájáhus ja almmuheapmi
Buot tevnnegiid maid oažžut gilvui geahčastuvvojit leat WRH opmodahkan ja vurkejuvvojit searvvi vuorkái. Buot tevnnegiid čájehuvvojit sierra čájáhusas man namma lea “Mánát boazodoalus - 2009” Boazoálbmogiid 4.Máilbmekongreassa vuolde Guovdageainnus njukčamánu 30.b. – cuoŋománu 3.b. 2009. WRH maid várre vuoigatvuođa čájehit tevnnegiid maŋit áiggis WRH lanjain ja ieš guđet lágidemiin WRH olis. WRH várre maid vuoigatvuođa válljet tevnnegiid mat galget lea mielde girjjis “Mánát boazodoalus 2009”, mii prentejuvvo ja almmuhuvvo maŋŋá kongreassa. Vejolaš sisaboađut girjji vuovdimis mannet ruhtadit WRH bargguide boazodoallománáid ja –nuoraid várás.

Tevnnegiid sádden, áigemearit ja eará
Tevnnegiid maid háliida galget leat mielde gilvvus, ferte sáddet čuovvovaš čujuhussii: WRH, P.O.Box 109, N-9521 Kautokeino, Norge. Dušše originálatevnnegat dohkkehuvvojit. Ii leat doarvái sáddet kopiija tevnnegiin. Gáibidat olles nama ja čujuhusa, ja dieđuid mat galget leat tevnnegis, gč. čuoggá 4 bajábealde, jos tevnnegat galget leat mielde gilvvus.

Tevnnegiid maid sádde poastta mielde, galget leat WRH kantuvrras ovdal njukčamánu 29.b. 2009. Dušše tevnnegat mat leat boahtán WRH kantuvrii ovdal áigemeari leat mielde gilvvus. Kongreassa sáttaolbmot ieš guđet guovllus sáhttet váldit mielde tevnnegiid sin guovllus. Mii dáhkidat ahte tevnnegat maid sáttaolbmot buktet kongressii, leat mielde gilvvus.